न्युजिल्याण्डमा भोलि बिहीबार देशव्यापी मेगा स्ट्राइक (आम हडताल) हुने भएको छ। यो आन्दोलनमा करिब १ लाख सहभागी हुने अनुमान गरिएको छ, जसमा स्वास्थ्य, शिक्षा, र सामाजिक सेवासहितका विभिन्न क्षेत्रका कर्मचारीहरू सामेल हुनेछन्।
यस आम हडतालमा नर्स, चिकित्सक, प्राथमिकदेखि तृतीय स्तरका शिक्षकहरू, स्वास्थ्यकर्मी, सामाजिक कार्यकर्ता, फिजियोथेरापिस्ट, ओक्युपेशनल थेरापिस्ट र ACC कर्मचारीहरू समेत सहभागी हुनेछन्। उनीहरूले सरकारको नीतिविरुद्ध र कामको अवस्था तथा पारिश्रमिकमा सुधारको माग गर्दै सडकमा उत्रिने तयारी गरेका छन्।
स्वास्थ्यकर्मीहरूले स्वास्थ्य सेवाका लागि पर्याप्त बजेट, उचित तलब, र सुरक्षित जनशक्ति स्तर सुनिश्चित गर्न माग गरेका छन्। त्यस्तै, शिक्षा क्षेत्रका कामदारहरूले उच्च तलब, सुधारिएको कार्य अवस्था, र विशेष आवश्यकता भएका विद्यार्थीहरूका लागि थप सहयोग माग गरेका छन्।
यो हडताल पूरै एक दिनसम्म चल्ने बताइएको छ, यद्यपि केही युनियनहरूले निश्चित घण्टासम्म मात्रै आन्दोलन गर्ने योजना बनाएका छन्।
सरकारले भने यस आम हडतालको कडा विरोध गरेको छ। सार्वजनिक सेवामा बाधा आउने चिन्ताका बीच सरकारले जनतालाई आवश्यक सेवाहरू अघि नै योजना बनाएर प्रयोग गर्न सुझाव दिएको छ।
इतिहास हेर्दा, न्युजिल्याण्डमा भएको सबैभन्दा ठूलो आम हडताल सन् १९७९ मा भएको थियो, जसमा ३ लाख कामदारहरू सहभागी भएका थिए।
