न्युजिल्याण्डको साउथ आइल्याण्डस्थित लेक टेकापोमा डुबेर एक भारतीय नागरिकको मृत्यु भएको छ।
प्रहरीका अनुसार मृत्यु हुने व्यक्ति ३४ वर्षीय बलदीप सिंह हुन्। उनी क्राइस्टचर्चमा बसोबास गर्ने भारतीय नागरिक थिए।
गत बिहीबार उनी लेक टेकापोको पानीमा प्रवेश गरेपछि बेपत्ता भएको सूचना प्राप्त भएको थियो। त्यसपछि प्रहरीले व्यापक खोजी तथा उद्धार अभियान सञ्चालन गरेको थियो।
दुई दिनसम्म चलेको खोजीपछि प्रहरी गोताखोरहरूले शुक्रबार उनको शव फेला पारेका थिए। बिहीबार साँझ करिब ८ बजे एक व्यक्ति पानीमा प्रवेश गरेर पुनः नआएको जानकारी प्राप्त भएपछि आपतकालीन सेवाहरू घटनास्थलमा परिचालन गरिएको थियो।
खोजी अभियानमा प्रहरीको खोज तथा उद्धार टोली, कोस्टगार्ड म्याकेन्जी लेक्सका स्वयंसेवक, फायर एन्ड इमर्जेन्सी न्युजिल्याण्ड तथा हेलिकोप्टरको सहभागिता रहेको थियो।
प्रहरीले घटनाबारे कोरोनरको तर्फबाट थप अनुसन्धान जारी रहेको जनाएको छ।
